बंगळुरु : अमेरिकेचे अध्यक्ष डोनाल्ड ट्रम्प यांचे नाव वापरुन १५० पेक्षा अधिक जणांची १ कोटींपेक्षा जास्त रुपयांची फसवणूक करण्यात आल्याचा धक्कादायक प्रकार समोर आला आहे. या फसवणूक झालेल्यांनी पोलिसांत धाव घेतली आहे.

 

कर्नाटकातील बंगळुरु, तामकुरु, मंगळुरु आणि हवेरी अशा वेगवेगळ्या ठिकाणी अनेकांची फसवणूक करण्यात आली आहे. या लोकांची फसवणूक करण्यासाठी आरोपींनी ‘ट्रम्प हॉटेल रेंटल’ नावाच्या अ‍ॅपचा वापर केला आणि त्यांनी गुंतवलेली रक्कम दुप्पट करण्याचे आश्वासन दिले. इतकेच नाही तर आरोपींनी लोकांचा विश्वास जिंकण्यासाठी डोनाल्ड ट्रम्प यांचा कृत्रिम बुद्धिमत्ता वापरून तयार केलेला व्हिडीओ देखील वापरण्यात आला. फसवण्यात आलेल्या लोकांना त्यांच्या गुंतवणुकीचा लवकर आणि मोठा मोबदला दिला जाईल असे सांगण्यात आले होते. फसवणूक करणार्‍यांच्या जाळ्यात अडकलेल्या पीडितांना त्यांनी केलेल्या गुंतवणुकीच्या बदल्यात भरपूर परतावा देण्याचे आश्वासन देण्यात आले होते, तसेच वर्क फ्रॉम होम करण्याची संधी देण्यात आली होती. एकट्या हावेरीमध्ये अशा १५ हून अधिक लोकांना फसवण्यात आले आहे, असे हावेरी सायबर क्राइम इकॉनॉमिक्स अँड नार्कोटिक्सचे (सीईएन) अधिकारी शिवशंकर आर गणाचारी यांनी सांगितले.एका पीडित व्यक्तीने सांगितले, की आम्हाला खाते उघडण्यासाठी एक हजार ५०० रुपये भरण्यास सांगून, कंपन्यांचे प्रोफाईल लिहिण्यास सांगण्यात आले.